يا خسارة .. نسى !!

ده فى ليلة قابلوه .. كلموه .. سألوه .. عن اسمى سألوه .. عن حبى سألوه .. قال ما اعرفوش .. ما قابلتوش .. ما شفتوش .. ما عاشرتوش .. قال يعنى مش فاكرنا .. ولا فاكر حب بينا وايامنا سوا ..قالكوا ايه ؟ قال ايه ؟ ما تستغربوش .. يوووه .. هو فى حد النهاردة بيفتكر ؟!!!

الاغنية دى لوردة سمعتها اكتر من مية مرة ومش عارف ليه المرة دى سرحت فى كلامها اوى وعدتها كتير لما صدعت . هو حد ممكن ينسى حد حبه ؟

ولا احنا بنضحك على نفسنا عشان نوهم نفسنا اننا نسينا ؟ طب ليه لما تيجى السيرة بنتخض ؟ وبتتفاوت الاعراض دى من حد لحد ؟ ويفضل سؤال سخيف ما لوش رد .. لما انا نسيته امال مال اهلى اتدهولت كدة ليه لما جات سيرته ؟!

الحقيقة اللى مش ممكن نخبيها اننا لما بنحب بجد عمرنا ما بننسى اللى حبيناه ده مهما بعدنا ومهما كانت اسباب البعد . مهما كان بشع وخاين وفيه كل العبر بيفضل هو الشخص الوحيد اللى ممكن يأثر فيك حتى لو مش موجود فى حياتك . سواء كان التأثير ده سلبى او ايجابى . سواء سيرته فكرتك بحاجات حلوة اوى تندمك انه مش معاك . او تفكرك بحاجات سيئة جدا وذكريات هباب بتندمك برضه انه مش معاك !!

لما نحس بزهق قاتل وما نبقاش عارفين من ايه ولما تحس ان كل المتع اختفت وقلت وان الدنيا مملة وسخيفة ومهما نلف وندور ونخترع اسباب لده ونفلسفها ونقول ده عشان كذا وده عشان كذا بيبقى دايما السبب الحقيقى لده برودة القلب وافتقاده لنصه التانى اللى بيخلى الحياة ليها لون وطعم وريحة . فكر كدة فى عز زهقك ده وخنقتك انك خدت حبيبك فى حضنك وبسته فى جبينه وانت تعرف ان الحياة ممكن يبقى ليها طعم تانى فى ثانية . فى حاجة فى الدنيا ربنا خالقها جوانا تجاه شخص بعينه بتحس معاه او بيه انك اقوى حد فى الدنيا دى وانك اضعف حد فى نفس الوقت . حد لما تبص فى عينه تحس انك اتخطفت وقلبك دق والدنيا اصفرت للحظتين كدة وبعدين رجعت ملونة تانى لو هو معاك ورجعت سودة لو كنتوا سبتوا بعض . ومش هيفرق كتير وقتها اسباب البعد ده ايه لانه هو الشخص الوحيد اللى خد خضار قلبك وطراوته وبراءته وهو الوحيد اللى شافك على حقيقتك . قبل ما القلب ده يتفحم ويبقى كل دوره انه يحافظ على حياتك .

صحيح فى قلوب بتحس بده وبتقدر قيمة انها تحب وانها تتحب وعارفة المسئولية اللى عليها فى الحالتين وفى قلوب تانية الحجر يمكن يكون الين منها شوية وما بتحسش اصلا انما فى النهاية المسألة مش اختيار ولا حد يقدر يدعى ايه اللى بيخلينا لما نحب نحد نحبه بجنون من غير ما نفكر لحظة هو يستاهل الحب ده ولا لا ؟.

صحيح ان الكلام فى ده مش جديد انما مش عارف ليه كل مدخل شتا تعلّ عليا اوى الافكار " السودة " دى !! يمكن عشان الشتا بيحسسك دايما بالحاجة للدفا ؟ الدفا اللى هو مش بطاطين ولا هو من برة اد ما هو دفا جاى من جوة . دفا يحركك ويخليك تمشى تتنطط تحت المطر فى عز البرد وانت ماسك ايده وبتاخد منها الدفا اللى مش ممكن تاخده من اى حتة تانية مهما اجتهدت . يمكن عشان لفحة البرد لما بتلمسك بتفكرك ان قلبك بردان وقرب يتجمد ؟ يمكن عشان شمس الشتا جميلة وغالية ومبهجة زى وش حبيبك وهو بيضحك ؟ الحقيقة مش عارف ومش عارف اصلا ايه اللى انا كاتبه ده .. ولاّ لازمته ايه فى السقعة دى ؟!!

ملحوظة :

تعليق سهر عجبنى اوى خصوصا شعرها عشان كدة نشرته هنا لانى حسيت انه باقى البوست .

لما الشتا يرمى

بحمله ع الكتاف

نبدأ نخاف

وندارى حلمنا الخفاف

لينبتوا هاجس هلع

وامسك فى قلبى لينخلع

ويلبى لضياعنا الندا

ف لحظة شتا

خوفك وصمتك

وارتعاشات السؤال

ف حضن برد الاجوبة

باصص بعينك ع الدفا

وخايف تقرب

ل الشمس تلسعك بلسانها

وتغيظك

انذار الدفا كداب !!