الناس معادن !!

زمان قالوا فى الامثال الناس معادن ويمكن تصنيفهم كمعادن جى لان اكتر حاجة كان فيها انواع مختلفة فى الوقت ده المعادن . يمكن لو كان المثل ده اضرب دلوقتى كانوا قالوا الناس زى موديلات النوكيا . ودى حاجة محتاجة مننا شوية تفكير ونشوف ان كنا احنا اللى بنغلط فى التعامل مع الناس ولا الناس هى هم اللى بيغلطوا فى التعامل معانا .

فى صنف من البشر وده نادر جدا لما تلاقيه بيبقى زى الاطفال . ابيض زى اللبن الحليب . اقل حاجة تأثر فيه . ممكن يدبح وما يتألمش عشان ألمه ده ما يضايقش الناس اللى بيحبهم . وعنده استعداد سرمدى للتضحية عشان حبايبه ايا كانت التضحيات ومهما قاسى منك او انت عملت فيه لو بيحبك تلاقيه فى لحظة نسى كل الاساءة لما تقابله وتضحك ليه . بس للاسف الصنف ده من الناس هو اكتر صنف عرضة للاكتئاب والاستهتار بمشاعره ويمكن السخرية منها كمان .على اعتبار انه عبيط وما بيحسش مع انى ما فيش حد فى الدنيا عبيط وما بيحسش هو بس اللى يا حول الله ربنا خالقه كدة ... عنده قابلية للحب بس ما بيعرفش يكره ولا يشيل . ان قابلت حد كدة امسك فيه بايديك وسنانك وحاسب عليه وانت بتعامله لانه لما بيحبك بيسيب قلبه فى ايدك بالمعنى الحرفى للكلمة يعنى بيشق صدره ويطلع قلبه ويسيبه فى ايدك فاى دوسة غلط ممكن تموته وانت مش حاسس .

النوع التانى بقى من البشر وللاسف هو الصنف المنتشر هو النوع اللى القلب بتاعه وظيفته انه يضخ الدم عشان يحافظ على حياته بس مش عشان يحس بيه . يعنى اساسا الحاسة اللى المفروض يستقبل بيها المشاعر مش موجودة . وكونك انت بقى تستنى منه انه يقدر مشاعرك او يحس بيك ـ واسف للتعبير ـ غباء منك مش تقصير منه . زى بالظبط لما تلاعب واحد كفيف باسكيت بول وتفضل قاعد جنبه مستنى انه يدخل الكورة الباسكيت . لو الكفيف دخل الكورة الباسكيت يبقى الصنف ده من الناس هيحس بيك . النوع ده لو حبيته ممكن يحرقك من غير ما يحس اصلا . حياته كلها متمركزة حوالين نفسه . ما يهموش كتير مشاعر الناس التانية ولا بيحس بيهم ولا يفرقوا معاه فى حاجة . وممكن عشان يحس بلحظة متعة يوهمك بالحب وانت تعيش بقى وتبنى احلام وتشربه لغاية ما يبقى جزء من دمك ولما المتعة اللى فى اللحظة تخلص يخلع ببساطة من غير ما يحس انه وهو بيخلع بياخد معاه حتة منك بتفضل ماشى بقية حياتك من غيرها وحاسس انها فاضية ومش عارف تملاها بحد تانى . وسبحان الله مش عارف ليه كلنا لما بنحب بنحب من الصنف ده اذا حظك بقى وقعك فى الصنف ده وده اكيد هيحصل فانفد بجلدك منه او باللى فضل فيك وعامله زى ما بتعامل التعبان اللى فى الصورة اللى فوق دى وقوله ربنا يسهلك بعيد عنى لاتأذينى ولا أأذيك !!

وفى صنف عامل زى مكنة التليفون ام شلن بتاعة زمان دى اللى كانت موجودة فى السنترال عارفينها ؟ طول ما بتحط الشلن اديك بتتكلم ولما شلناتك تخلص بتسمع توووووووت !! يعنى طول ما بياخد منك فهو انيسك وجليسك وخادمك ومولاك . ولما تشحط او تفكر مرة تختبر مشاعره ناحيتك وتشوف ان كان بيحبك لنفسك او بيحبك للى معاك ما تلحقش تعرف النتيجة لانك مش هتلاقيه فى حياتك اساسا . هو موجود عشان اللى معاك موجود ايا كان اللى معاك سواء فلوس بقى او سلطة او منصب او اى مصلحة يطلع بيها منك والسلام . يعنى ناس بتمن وارخص حاجة فى الدنيا هى الحاجة اللى ليها تمن فما تخاطرش وتسيب مشاعرك لحد بيعاملك كدة لانك لو معاك النهاردة وقادر تشترى مشاعره بكرة ممكن ما يبقاش معاك وساعتها هو اللى هيسيبك ويدور على حد غيرك .

تفضل بقى نقطة مهمة جدا فيك انت وانت بتعامل الناس . انك تفرق بين الحب والهوى . الحب لما تحس بمشاعر جميلة ناحية حد بعينه وتحس بالضعف اللذيذ ده قصاد فلان ده بس . بس فى نفس الوقت تكون قادر تحكم عليه صح وان لقيت انه مش مقدر حبك ليه تقدر تبعد فى الوقت المناسب قبل ما الحب يتحول لهوى وتفقد السيطرة على نفسك من شدة حبك ليه . عشان كدة القران الكريم قال " ولا تتبع الهوى فيضلك عن سبيل الله " . يعنى لازم قبل ما تمد رجلك خطوة فى اى علاقة مع حد تشوف رجلك رايحة فين وهتعرف ترجع الخطوة دى ولا هتاخد الهدر لاخره !!

طبعا الموضوع فيه جانب قدرى ما حدش يقدر يغفله يعنى مش بمزاجنا اننا نحدد نوع الشخص اللى القدر بيحطه فى طريقنا وبالتالى ينفع نطبق معاه الكلام ده بس فى نفس الوقت دى خبرات مهمة ادفع فيها وقت وفلوس وصحة وسهر ليالى بتخلينا نفهم على اد ما نقدر طبيعة الناس اللى بنتعامل معاها وما نضيعش وقت فى اننا نحشيها جوة قالب هى مش اده ومش هتدخل فيه مهما عملنا .